ബോംബ് ഭീഷണി; ഡല്‍ഹിയില്‍ മൂന്ന് സ്‌കൂളുകള്‍ പരീക്ഷകളടക്കം നിർത്തിവെച്ച് ഒഴിപ്പിച്ചു, പരിശോധന തുടരുന്നു
ഡല്‍ഹിയില്‍ സ്‌കൂളുകള്‍ക്ക് നേരെ ബോംബ് ഭീഷണി. മൂന്ന് സ്‌കൂളുകള്‍ക്ക് നേരെയാണ് ഇമെയിലിലൂടെ ബോംബ് ഭീഷണിയുണ്ടായത്. തുടര്‍ന്ന് സ്‌കൂളിലുണ്ടായിരുന്ന എല്ലാവരെയും പുറത്തിറക്കി. പരിശോധന തുടരുകയാണ്.
ചാണക്യപുരിയിലുള്ള സന്‍സ്‌കൃതി സ്‌കൂള്‍, മയൂര്‍ വിഹാറിലെ മദര്‍ മേരി സ്‌കൂള്‍, ഡല്‍ഹി പബ്ലിക് സ്‌കൂള്‍ എന്നിവയ്ക്കു നേരെയാണ് ബോംബ് ഭീഷണിയുണ്ടായത്. ഇതിൽ മദർമേരി സ്‌കൂളിൽ പരീക്ഷ നടക്കുകയായിരുന്നു. വിവരം കിട്ടിയതോടെ പരീക്ഷ നിർത്തിവെക്കുകയും സ്‌കൂൾ പരിസരം വിടാൻ എല്ലാവരോടും ആവശ്യപ്പെടുകയും ചെയ്തു.
ഉടന്‍ തന്നെ ലോക്കല്‍ പൊലീസില്‍ വിവരം അറിയിക്കുകയും സ്‌കൂള്‍ പരിസരം ഒഴിപ്പിക്കുകയുമായിരുന്നു. ബോംബ് സ്‌ക്വാഡും അഗ്നിരക്ഷാ സേനയും ഉള്‍പ്പടെ സ്ഥലത്ത് പരിശോധന നടത്തുകയാണ്. ഇതുവരെ സംശയാസ്പദമായ ഒന്നും കണ്ടെത്തിയിട്ടില്ലെന്ന് അധികൃതര്‍ അറിയിച്ചു.
