യു.എസ് മിഷണറി സംഘത്തിലെ രണ്ടു പേര്‍ മോചിതരായി

ഹെയ്തിതിയില്‍ കൊള്ളസംഘം തട്ടിക്കൊണ്ടുപോയി ബന്ദിയാക്കിയ 17 അംഗ യു.എസ്. മിഷണറി സംഘത്തിലെ രണ്ടുപേരെ മോചിപ്പിച്ചു. ഇക്കാര്യം ഒഹായോ ആസ്ഥാനമായി പ്രവര്‍ത്തിക്കുന്ന ക്രിസ്ത്യന്‍ മിഷന്‍ സഭയുടെ വെബ്സൈറ്റിലെ പ്രസ്താവനയില്‍ സ്ഥിരീകരിച്ചിട്ടുണ്ട്. മോചിതരായ രണ്ടു പേരും ഉന്മേഷവാന്മാരാണെന്നും വിശദീകരണമുണ്ട്.

കഴിഞ്ഞ 16-നാണ് പതിനാറ് യു.എസ്. പൌരന്മാരും ഒരു കനേഡിയന്‍ പൌരനുമുള്‍പ്പെടുന്ന മിഷണറി സംഘത്തെ കൊള്ളസംഘം തട്ടിക്കൊണ്ടു പോയത്. അനാഥാലയത്തില്‍ നിന്നും താമസസ്ഥലത്തേക്കു മടങ്ങും വഴിയായിരുന്നു ഇത്.

മിഷണറി സംഘത്തില്‍ 18-നും 48-നും ഇടയില്‍ പ്രായമുള്ള 12 പേരും എട്ടു മാസം മുതല്‍ 15 വയസ് വരെ പ്രായമുള്ള 5 കുട്ടികളുമാണുണ്ടായിരുന്നത്. മോചിതരായവരുടെ പേര്, മോചനത്തിന്റെ കാരണം, അവര്‍ ഇപ്പോള്‍ എവിടെയാണ് എന്നീ കാര്യങ്ങള്‍ ഈ ഘട്ടത്തില്‍ വെളിപ്പെടുത്താനാവില്ലെന്നും പ്രസ്താവനയില്‍ പറയുന്നു.

ഹെയ്ത്തി പ്രസിഡന്റ് ജോവനേല്‍ മോയിസ് കഴിഞ്ഞ ജൂലൈയില്‍ വീട്ടില്‍ വെടിയേറ്റ് മരിച്ചതിനുശേഷം രാജ്യത്തെ ക്രമസമാധാന നില തകര്‍ന്ന് അവസ്ഥയിലാണ്. മോചന ദ്രവ്യത്തിനായി ആളുകളെ തട്ടിക്കൊണ്ടു പോകുന്നതും പതിവായിരിക്കുകയാണ്.