മതപരിവർത്തനം ആരോപിച്ച് പാസ്റ്ററും മറ്റ് ആറ് പേരും അറസ്റ്റിൽ

മതപരിവർത്തന വിരുദ്ധ നിയമം ലംഘിച്ചുവെന്നാരോപിച്ച് ഉത്തർപ്രദേശിൽ ഒരു പാസ്റ്ററും ഒരു സ്ത്രീയും ഉൾപ്പെടെ ഏഴ്  പേരെ അറസ്റ്റ് ചെയ്യുകയും അവരുടെ പ്രാർത്ഥനാ ഹാൾ പോലീസ് സീൽ ചെയ്യുകയും ചെയ്തു.

വടക്കൻ ഉത്തർപ്രദേശിലെ ഗാസിപൂർ ജില്ലയിലെ ബഡേസർ ഗ്രാമത്തിൽ ജൂലൈ 23 ന് ഞായറാഴ്ച പ്രാർത്ഥനാ ശുശ്രൂഷ പോലീസ് തടസ്സപ്പെടുത്തി. അവർ പാസ്റ്ററെയും മറ്റ് ആറ് പേരെയും പോലീസ് സ്റ്റേഷനിലേക്ക് കൊണ്ടുപോയി, അവിടെ ഒരു രാത്രി  മുഴുവൻ തടവിൽ വെക്കുകയുണ്ടായി . ജൂലൈ 24 ന് പ്രാദേശിക കോടതിയിൽ ഹാജരാക്കിയ ഏഴുപേരെയും ജുഡീഷ്യൽ കസ്റ്റഡിയിൽ റിമാൻഡ് ചെയ്തു.

"ഇത് ഞങ്ങളുടെ ആളുകൾക്കെതിരായ തികച്ചും തെറ്റായ കേസാണ്," ബഡേസറിലെ പ്രൊട്ടസ്റ്റന്റ് ജെയിംസ് പ്രാർത്ഥനാ ഭവന്റെ  തലവനായ അറസ്റ്റിലായ പാസ്റ്റർ വിനോദ് കുമാർ ജെയിംസിന്റെ മകൻ വിക്രാന്ത് കുമാർ ജോൺ പറഞ്ഞു.

ഞായറാഴ്ച ശുശ്രൂഷയ്ക്കിടെ 50 പേരടങ്ങുന്ന  പോലീസ് സംഘം  കടന്നു വരികയും  ഞങ്ങൾ മതപരിവർത്തനം നടത്തുന്നുവെന്ന് ആരോപിച്ച് അവർ പള്ളിക്കുള്ളിലേക്ക് ഓടിക്കയറി പ്രാർത്ഥന നിർത്തിവച്ചു,” അദ്ദേഹം പറഞ്ഞു.

ബൈബിളിന്റെയും മറ്റ് ക്രിസ്ത്യൻ പുസ്തകങ്ങളുടെയും പകർപ്പുകളും അവർ പിടിച്ചെടുത്തു.

700 ഓളം പേർ പങ്കെടുത്ത ആരാധനായോഗത്തിൽ നിന്ന്,  അവർ പാസ്റ്ററെയും മറ്റ് ആറ് പേരെയും അറസ്റ്റ് ചെയ്യുകയും മറ്റുള്ളവരെ വീട്ടിലേക്ക് പോകാൻ അനുവദിക്കുകയും ചെയ്തു.

“പോലീസ് മുൻകൂട്ടി ആസൂത്രണം ചെയ്ത പ്രകാരമാണ് പ്രവർത്തിക്കുന്നത്,” ജോൺ ആരോപിച്ചു, ജിതേന്ദ്ര കുമാർ എന്ന വ്യക്തി  നേരത്തെ തന്റെ അനുയായികളെ പ്രാർത്ഥനാ ഹാളിലേക്ക് അയച്ച് പരാതി നൽകിയിരുന്നു.

വെള്ളി, ഞായർ ദിവസങ്ങളിൽ പാസ്റ്റർ ജയിംസ്  നൂറുകണക്കിന് ആളുകൾ പങ്കെടുക്കുന്ന പ്രത്യേക പ്രാർത്ഥനകൾ നടത്തിയിരുന്നതായി ജിതേന്ദ്ര കുമാർ പരാതിയിൽ ആരോപിച്ചു.

ക്രിസ്ത്യാനികളാകാൻ പാസ്റ്റർ ജനങ്ങൾക്ക് 45,000 രൂപയും ജോലിയും വാഗ്ദാനം ചെയ്തതായി അദ്ദേഹം ആരോപിച്ചു.

ജോലിയും പണവും വാഗ്ദാനം ചെയ്ത് ഞങ്ങൾ ആരെയും മതം മാറ്റിയിട്ടില്ലെന്നും വിക്രാന്ത് കുമാർ ജോൺ പറഞ്ഞു.