ജമ്മു കശ്മീരിലെ കത്വയിൽ ഭീകരാക്രമണത്തിൽ മൂന്ന് പൊലീസുകാർക്ക് വീരമൃത്യു; മൂന്ന് ഭീകരരെ വധിച്ചു

Mar 28, 2025 - 09:34
 0
ജമ്മു കശ്മീരിലെ കത്വയിൽ ഭീകരാക്രമണത്തിൽ മൂന്ന് പൊലീസുകാർക്ക് വീരമൃത്യു; മൂന്ന് ഭീകരരെ വധിച്ചു
ജമ്മു കശ്മീരിലെ കത്വ ജില്ലയിലെ വനമേഖലയിൽ ഭീകരാക്രമണത്തിൽ മൂന്ന് പൊലീസുകാർക്ക് വീരമൃത്യു‌. പൊലീസ് ഡിഎസ്പി ഉൾപ്പെടെ 7 സുരക്ഷാ സേനാംഗങ്ങൾക്കു പരിക്കേറ്റു. ഏറ്റുമുട്ടലിൽ മൂന്ന് പാക് ഭീകരരെ സേന വധിച്ചു. കനത്ത വെടിവയ്പ്പ് നടന്ന വിദൂര വനമേഖലയിൽ ഭീകരസംഘത്തിലെ മറ്റു മൂന്ന് പേർ‌ക്കായി തിരച്ചിൽ തുടരുന്നതായാണ് റിപ്പോർട്ട്.

ജമ്മു കശ്മീർ പൊലീസിലെ സ്പെഷൽ ഓപ്പറേഷൻസ് ഗ്രൂപ്പിന്റെ (എസ്ഒജി) നേതൃത്വത്തിൽ പൊലീസിന്റെയും സൈന്യത്തിന്റെയും അർധസേനാവിഭാഗങ്ങളുടെയും പിന്തുണയോടെയായിരുന്നു ഭീകരരെ നേരിട്ടത്. ഹിരാനഗർ സെക്ടറിൽ ഞായറാഴ്ച ഏറ്റുമുട്ടൽ നടന്ന സ്ഥലത്ത് നിന്ന് ഏകദേശം 30 കിലോമീറ്റർ അകലെയുള്ള രാജ്ബാഗിലെ ഘാട്ടി ജുത്താന പ്രദേശത്തെ ജാഖോലെ ഗ്രാമത്തിന് സമീപം സുരക്ഷാ സേന തീവ്രവാദികളെ കണ്ടതോടെയാണ് വ്യാഴാഴ്ച രാവിലെ വെടിവയ്പ്പ് ആരംഭിച്ചത്.

അവസാന റിപ്പോർട്ടുകൾ ലഭിക്കുമ്പോൾ കൂടുതൽ സൈന്യം പ്രദേശത്തേക്ക് വിന്യസിക്കപ്പെട്ടിട്ടുണ്ടെന്നും ഇരുവിഭാഗവും തമ്മിൽ വെടിവയ്പ്പ് നടക്കുന്നുണ്ടെന്നും ഉദ്യോഗസ്ഥർ വാർത്താ ഏജൻസിയായ പിടിഐയോട് പറഞ്ഞു. ഞായറാഴ്ച പ്രദേശത്ത് സുരക്ഷാ സേനയുമായി വെടിവയ്പ്പിൽ ഏർപ്പെട്ടിരുന്ന അതേ സംഘമാണ് തീവ്രവാദികളെന്ന് കരുതപ്പെടുന്നു.

കഴിഞ്ഞ ഒരു വർഷമായി പാകിസ്ഥാൻ ആസ്ഥാനമായുള്ള ഭീകരർക്ക് ഉദംപൂർ, ദോഡ, കിഷ്ത്വാർ ജില്ലകളിലെ ഉയർന്ന പ്രദേശങ്ങളിലേക്കും കശ്മീരിലേക്കും എത്താനുള്ള ഒരു പ്രധാന നുഴഞ്ഞുകയറ്റ മാർഗമായി കത്വ ഉയർന്നുവന്നിട്ടുണ്ട്, ഇത് നിരവധി ഭീകരാക്രമണങ്ങളിൽ നിന്ന് വ്യക്തമാണ്. ഇതാണ് തീവ്രവാദികളെ ഇല്ലാതാക്കുന്നതിനുള്ള പ്രവർത്തനങ്ങൾ ത്വരിതപ്പെടുത്താൻ സുരക്ഷാ സേനയെ പ്രേരിപ്പിച്ചത്.

English Summary: An encounter broke out in Jammu and Kashmir’s Kathua district, where a massive anti-terror operation has been underway for the last four days. Three terrorists were killed in the gunfight, while three police personnel also lost their lives